ଆଜି ରାଜସ୍ଥାନ ଓ ମଧ୍ୟପ୍ରଦେଶ ଗସ୍ତ କରିବେ ପ୍ରଧାନମନ୍ତ୍ରୀ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ରାଜସ୍ଥାନ ଓ ମଧ୍ୟପ୍ରଦେଶ ଗସ୍ତ କରିବେ। ପୂର୍ବାହ୍ଣ ପ୍ରାୟ ୧୧ଟା ୧୫ରେ ରାଜସ୍ଥାନର ଯୋଧପୁରରେ ପ୍ରଧାନମନ୍ତ୍ରୀ ସଡକ, ରେଳ, ବିମାନ ଚଳାଚଳ, ସ୍ୱାସ୍ଥ୍ୟ ଓ ଉଚ୍ଚଶିକ୍ଷା କ୍ଷେତ୍ରରେ ପ୍ରାୟ ୫୦୦୦ କୋଟି ଟଙ୍କା ମୂଲ୍ୟର ଏକାଧିକ ବିକାଶମୂଳକ ପ୍ରକଳ୍ପର ଉଦ୍ଘାଟନ କିମ୍ବା ଶିଳାନ୍ୟାସ କରିବେ। ଏହାପରେ ଅପରାହ୍ଣ ପ୍ରାୟ ସାଢ଼େ ୩ଟା ସମୟରେ ମଧ୍ୟପ୍ରଦେଶର ଜବଲପୁରରେ ପହଞ୍ଚି ସଡ଼କ, ରେଳ, ଗ୍ୟାସ୍, ପାଇପଲାଇନ୍, ଆବାସ ଏବଂ ସ୍ବଚ୍ଛ ପାନୀୟଜଳ ପରି କ୍ଷେତ୍ରରେ ୧୨,୬୦୦ କୋଟି ଟଙ୍କା ପ୍ରକଳ୍ପର ଉଦ୍ଘାଟନ ଓ ଶିଳାନ୍ୟାସ କରିବେ।
ରାଜସ୍ଥାନରେ ସ୍ୱାସ୍ଥ୍ୟ ଭିତ୍ତିଭୂମିକୁ ମଜବୁତ କରିବା ପାଇଁ ପ୍ରଧାନମନ୍ତ୍ରୀ ଗୁରୁତ୍ୱପୂର୍ଣ୍ଣ ପ୍ରକଳ୍ପର ମୂଳଦୁଆ ପକାଇବେ। ଏହି ପ୍ରକଳ୍ପ ଅନ୍ତର୍ଗତ ଅଲ୍ ଇଣ୍ଡିଆ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (ଏମ୍ସ), ଯୋଧପୁରରେ ୩୫୦ ଶଯ୍ୟା ବିଶିଷ୍ଟ ‘ଟ୍ରମା ସେଣ୍ଟର ଓ କ୍ରିଟିକାଲ୍ କେୟାର ହସ୍ପିଟାଲ ବ୍ଲକ୍’ ଏବଂ ସମଗ୍ର ରାଜସ୍ଥାନରେ ପ୍ରଧାନମନ୍ତ୍ରୀ-ଆୟୁଷ୍ମାନ୍ ଭାରତ ହେଲ୍ଥ ଇନ୍ଫ୍ରାଷ୍ଟ୍ରକ୍ଚର ମିସନ୍ (ପିଏମ୍-ଏବିଏଚ୍ଆଇଏମ୍) ଅନ୍ତର୍ଗତ ସାତଟି କ୍ରିଟିକାଲ୍ କେୟାର ବ୍ଲକ୍ର ବିକାଶ କରାଯିବ। ଏମ୍ସ ଯୋଧପୁରରେ ‘ଟ୍ରମା ଏମର୍ଜେନ୍ସି ଏବଂ କ୍ରିଟିକାଲ୍ କେୟାର’ ପାଇଁ ଏକୀକୃତ କେନ୍ଦ୍ର ୩୫୦ କୋଟିରୁ ଅଧିକ ନିବେଶରେ ବିକାଶ କରାଯିବ।
ଯୋଧପୁର ବିମାନବନ୍ଦରରେ ଅତ୍ୟାଧୁନିକ ନୂତନ ଟର୍ମିନାଲ୍ ବିଲ୍ଡିଂର ବିକାଶ ପାଇଁ ପ୍ରଧାନମନ୍ତ୍ରୀ ଭିତ୍ତି ପ୍ରସ୍ତର ସ୍ଥାପନ କରିବେ। ମୋଟ ୪୮୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ଏହି ଟର୍ମିନାଲ୍ ବିଲଡିଂ ପ୍ରାୟ ୨୪,୦୦୦ ବର୍ଗମିଟର ଅଞ୍ଚଳରେ ବିକଶିତ ହେବ। ପ୍ରଧାନମନ୍ତ୍ରୀ ମଧ୍ୟ ଆଇଆଇଟି ଯୋଧପୁର କ୍ୟାମ୍ପସକୁ ଦେଶ ପାଇଁ ଉତ୍ସର୍ଗ କରିବେ। ୧୧୩୫ କୋଟିରୁ ଅଧିକ ଟଙ୍କା ବ୍ୟୟରେ ଅତ୍ୟାଧୁନିକ କ୍ୟାମ୍ପସ ନିର୍ମାଣ କରାଯାଇଛି।
