ଏଣିକି ଏସ୍ସିବିରେ ଆଡମିସନ୍ ପାଇଁ ଆଧାର କାର୍ଡ ବାଧ୍ୟତାମୂଳକ
କଟକ: ଏସ୍ସିବି ପକ୍ଷରୁ ଜାରି ହୋଇଛି ନୂଆ ନିୟମ । ଡାକ୍ତରଖାନାର ବିଭିନ୍ନ ୱାର୍ଡରେ ଆଡ୍ମିସନ୍ ନେଇ ଚିକିତ୍ସା ହେଉଥିବା ରୋଗୀଙ୍କ ପାଇଁ ଆଧାର କାର୍ଡ ଲାଗୁ କରାଯାଇଛି । ଫଳରେ ଏଣିକି ବିଭାଗୀୟ ସ୍ତରରେ ୱାର୍ଡ ହେଉ କିମ୍ବା ଆଇସିୟୁରେ ଚିକିତ୍ସାଧୀନ ରୋଗୀ, ଦୁର୍ଘଟଣାଗ୍ରସ୍ତ, ପ୍ରସୂତି, ସମସ୍ତଙ୍କୁ ଆଧାର କାର୍ଡ ଜେରକ୍ସ କପି ଜମା କରିବାକୁ ହେବ । ଏ ସଂକ୍ରାନ୍ତରେ ଡାକ୍ତରଖାନା ଅଧୀକ୍ଷକ ଏସ୍ସିବିର ସମସ୍ତ କ୍ଲିନିକାଲ୍ ବିଭାଗର ମୁଖ୍ୟ ଏବଂ ୱାର୍ଡର ନର୍ସିଂ ଅଫିସର ଇନଚାର୍ଜମାନଙ୍କୁ ଚିଠି ମାଧ୍ୟମରେ ଅବଗତ କରାଇଛନ୍ତି । ଆଡ୍ମିସନ୍ ସମୟରେ ଯଦି କେହି ଆଧାର କାର୍ଡ ଜେରକ୍ସ ଜମା କରି ନପାରିଲେ, ଚିକିତ୍ସା ସମୟ ଭିତରେ ସମ୍ପର୍କୀୟମାନେ ୱାର୍ଡରେ ଜମା କରିପାରିବେ ବୋଲି ବ୍ୟବସ୍ଥା ରଖାଯାଇଛି ।
ଏସ୍ସିବି ଆଉଟ୍ଡୋର୍ରେ ଏବଂ ଆଶୁ ଚିକିତ୍ସା କେନ୍ଦ୍ରରେ ଆଡମିସନ୍ କରାଯିବା ସମୟରେ ରୋଗୀ, ଦୁର୍ଘଟଣାଗ୍ରସ୍ତ ଏବଂ ପ୍ରସୂତିଙ୍କ ନାମ ଓ ଠିକଣା ଆଦି ସବିଶେଷ ବିବରଣୀ ଲେଖା ହେବା ବେଳେ ଅଧିକାଂଶ ରୋଗୀଙ୍କ ସଂପର୍କୀୟ ଠିକ୍ ତଥ୍ୟ ଦେଉନାହାନ୍ତି । ଫଳରେ ପରବର୍ତ୍ତୀ ସମୟରେ ବହୁ ସମସ୍ୟା ଉପୁଜୁଛି । ଚିକିତ୍ସାଧୀନ ରୋଗୀ କିମ୍ବା ଦୁର୍ଘଟଣାଗ୍ରସ୍ତଙ୍କ ମଧ୍ୟରୁ କୌଣସି ୱାର୍ଡରେ ଯଦି କାହାର ମୃତ୍ୟୁ ଘଟୁଛି, ସେମାନଙ୍କ ନାଁ କିମ୍ବା ଠିକଣା ଭୁଲ୍ ଉଲ୍ଲେଖ ଥିଲେ ମୃତକଙ୍କ ସମ୍ପର୍କୀୟମାନେ କଟକ ମହାନଗର ନିଗମ (ସିଏମ୍ସି)ରୁ ମୃତ୍ୟୁ ସାର୍ଟିଫିକେଟ୍ ପାଇବା ପାଇଁ ହଇରାଣ ହେଉଛନ୍ତି । କାରଣ ବେଡ୍ହେଡ୍ ଟିକେଟ୍ରେ ଉଲ୍ଲେଖ ଥିବା ସୂଚନା ଆଧାରରେ ସିଏମ୍ସିରେ ମୃତକଙ୍କ ନାଁ ଏସ୍ସିବି ପକ୍ଷରୁ ଅନ୍ଲାଇନ୍ରେ ପଞ୍ଜିକୃତ ହୋଇଥାଏ । ପଞ୍ଜୀକରଣ ସମୟରେ ଉଲ୍ଲେଖ ଥିବା ତଥ୍ୟ ଆଧାରରେ ଆବେଦନକାରୀଙ୍କୁ ମତ୍ୟୁ ପ୍ରମାଣପତ୍ର (ଡେଥ୍ ସାର୍ଟିଫିକେଟ୍) ମିଳିଥାଏ ।
