ଭାରତ-ଆମେରିକା ସମ୍ପର୍କ ଚନ୍ଦ୍ରଯାନ ଭଳି ନୂତନ ଉଚ୍ଚରେ ପହଞ୍ଚିଛି: ଏସ୍ ଜୟଶଙ୍କର

ନୂଆଦିଲ୍ଲୀ: ଭାରତ-ଆମେରିକା ସମ୍ପର୍କକୁ ନେଇ ବିଦେଶ ମନ୍ତ୍ରୀ ଏସ୍ ଜୟଶଙ୍କର ସୋମବାର ମତ ଦେଇଛନ୍ତି ଯେ, ଦୁଇ ଦେଶର ସମ୍ପର୍କର ଗଭୀରତାକୁ ମାପିବା କଷ୍ଟକର। ଦୁଇ ଦେଶ ବର୍ତ୍ତମାନ ପରସ୍ପରକୁ ‘ଈପ୍ସିତ, ଶ୍ରେଷ୍ଠ ଓ ସ୍ବସ୍ତିଦାୟକ ଅଂଶୀଦାର’ ଭାବରେ ଦେଖୁଛନ୍ତି। ୱାସିଂଟନରେ ଭାରତୀୟ ସମୁଦାୟର ଏକ କାର୍ଯ୍ୟକ୍ରମକୁ ସମ୍ବୋଧିତ କରି ଜୟଶଙ୍କର ଉପରୋକ୍ତ ମତ ପ୍ରକାଶ କରିଛନ୍ତି। ଜୟଶଙ୍କର ଚଳିତ ସପ୍ତାହରେ ଆମେରିକାର ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ୍, ଆମେରିକା ପ୍ରଶାସନର ବରିଷ୍ଠ ସଦସ୍ୟ, ଆମେରିକାର ବ୍ୟବସାୟୀ ନେତା ଏବଂ ଥିଙ୍କ ଟ୍ୟାଙ୍କ ବିଶେଷଜ୍ଞଙ୍କ ସହ ଆଲୋଚନା କରିଛନ୍ତି। ବୈଦେଶିକ ବ୍ୟାପାର ମନ୍ତ୍ରୀ କହିଛନ୍ତି ଯେ, ଭାରତ ଓ ଆମେରିକା ମିଳିତ ଭାବେ କାମ କରିବା ପାଇଁ ଏକ ଅତ୍ୟନ୍ତ ବାଧ୍ୟତାମୂଳକ ଆବଶ୍ୟକତା ରହିଛି।

ସେ କହିଛନ୍ତି ଯେ ଆମେ ପରସ୍ପର ସହିତ ଯେତେ ଅଧିକ ମିଶି କାମ କରିବୁ, ସେତେ ଅଧିକ ସଫଳତା ହାସଲ କରିବୁ। ଇସ୍ରୋର ଐତିହାସିକ ଚନ୍ଦ୍ରଯାନ ମିସନ ପରି ଭାରତ-ଆମେରିକା ଦ୍ୱିପାକ୍ଷିକ ସମ୍ପର୍କ ନୂତନ ଉଚ୍ଚତାରେ ପହଞ୍ଚିଛି ଏବଂ ତା’ଠୁ ଆହୁରି ଅଧିକ ଉପରକୁ ଯିବ ବୋଲି ଜୟଶଙ୍କର କହିଥିଲେ। ଚଳିତ ବର୍ଷ ଜୁନ୍ ମାସରେ କାନାଡା ମାଟିରେ ଖାଲିସ୍ତାନୀ ଆତଙ୍କବାଦୀ ହରଦୀପ ସିଂହ ନିଜାରର ହତ୍ୟା ମାମଲାରେ କାନାଡା ସହିତ କୂଟନୈତିକ ବିବାଦ ମଧ୍ୟରେ ଜୟଶଙ୍କର ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନଙ୍କୁ ଭେଟିଥିଲେ। ଜୟଶଙ୍କର ଶୁକ୍ରବାର ଆମେରିକାର ପ୍ରତିରକ୍ଷା ସଚିବ ଓଲିଉଡ ଅଷ୍ଟିନଙ୍କ ସହ ମଧ୍ୟ ଆଲୋଚନା କରିଥିଲେ।